Huntúul ah ka'ansahe', sáansamal u hóok'ol báaxal yéetel u mehen kàanbalo'ob.
Hunp'éel k'ìine', tan u báaxtiko'ob le chuklantáanbalo', ka tu héentáantubah hPèedro yéetel hEduardo. Náach tu'ux lúub hPedro.
Le ka'a k'uch le ah ka'ansah yiknalo', ka tu yilahe' tu hóok'ol u k'i'ik'el u pòol le pàalo'.
Te' chàan kàah tu'ux ku ts'àah xòoko', mina'an ts'akyahi', le bèetik letie' ah ka'ansaho'ob ts'akik le pàalal ku lúubulo'obo'.
Óotsil ah ka'ansahe', tu ch'a'ah hunp'éel sak p'o' utia'al u p'o'ik u pòol h Pedro.
Le ka tu yilah x Rosa bix u hóok'ol u k'i'ik'el h Pedro'e' ka bin u ch'a'a hunp'éel máaskab utia'al u ch'akik hunhéek' ha'abin, ts'o'okole' ka ho'op' u ho'ochik u sóol u ts'ah tu pòol h Pedro.
Ah ka'ansahe' ha'ak' yóol ka tu yilah ba'ax ku bèetik x Rosa. Ka tu ya'alah ti' beya':
-XRosa ¿ba'ax ka ts'aik tu pòol le h Pedro'o?
-U sóol ha'abin, yóo'lal u níikil u hóok'ol u k'i'ik'el
-¿Máax ka'anstech a bèeteh?
-In tàatah, bey u bèetik le ken u ch'ak u yòoko'.
Hàah u t'àan x Rosa, le ka tu ya'alah hunsúutuke', ts'o'ok u níikil u hóok'ol u k'i'ik'el u pòol h Pedro.
