Yanjij bin juntúul chan t’u’ule’ sáansamal ku bin janal ti’ junp’éel tsek’el. Junp’eel k’iine’ yanji u yilikubaj yéetel juntúul jkoj, ka a’ala’ab ti’e’:
-Bejela’a túun kin in ki’i jaanteche’, Jwaan.
Ka tu núukaj Jwaane’:
-Eyaj, báanten bíin a jaannten. Tene’ p’ata’anen in kaláant le chak’ana’ utia’al ma’ u yokol mixba’al k’askuntik. Chéen je’ebix in taal ta paach je’ tu’ux ka ookeche’, ja’alil ka a kuch in wo’och su’uke’ yo’olal u páajtal in taal ta paach.
Ka tu ya’alaj nuxi’ jkoje’:
-Ma’alob wa tumen je’ a taal tin paache’ kin kuchik a wo’och su’uk.
Ja’alibe’ Jwaane’ ka tu k’axaj ka’a kúuch su’uke’ ka tu ts’aj tu yóok’ol jkoj, ts’o’okole’ ka tu tatal k’axtaj tu paach, tu k’axaj tak tu káap u yook tuláakal tu’ux tu k’a’ak’a’axaj, ts’o’okole’ ka jo’op’ u bino’ob. Chéen ichil tu bino’obe’, ka tu ya’alaj Jwaane’:
-Ma’alob, je’ebix tumen ts’o’ok a kuchik in wo’och su’uko’, yaan xan a kuchiken. Pa’atik in na’akal ta paach yo’olal u páajtal in bin seen ma’alob.
Ka tu ya’alaj jnuxi’ jkoje’:
Jwaane’ ka j na’ak tu paach nuxi’ jkoje’ ka jo’op u bino’ob. Chéen ichil táan u bino’obe’ ka tu t’abaj u chaamal Jwaan, ka tu ya’alaj jnuxi’ jkoje’:
-Eyaj, Jwaan, bik a t’ab le su’uk tin paacho’.
Ja’alibe’ Jwaane’, chéen tu yu’ubaj ba’ax a’ala’ab ti’o’, ka jo’op’ u ki’ ts’u’uts’, ka’alikil táan u bin yóok’ol jnuxi’ jkoj. Le ka xu’up u chaamale’, ka tu kapaj u yala’ yóok’ol le su’uk u kuchmaj jkojo’, chéen p’eel tu yilajil Jwaan ts’o’ok u ch’a’ik k’áak’ le su’uko’, jach le ku xúukulo’ob tu chi’ junp’éel ts’ono’ote, Jwaane’ ka tu k’áalch’intajubaj ka j eemij. Jnuxi’ jkoje’ ka jo’op’ u máan u p’u’up’uchikubaj utia’al u tupik u k’áak’il, ba’ale’ jach t’a’ab le su’uk u kuchmajo’ ka tu k’aranchiintajubaj ts’ono’ot. Ti’ lelo’ ka jtu’upij, le ka ts’o’ok u yilik bix u tu’upule’ ka jóok’e ka tu ya’alaj:
-Eyaj, Jwaan j beet yóolaj ten, ba’ale’ yan in chukik utia’al in jaantej, ts’o’ok u beetik yo’olal je’ebix bíin yóoltike’.
Le ku tsáayal tu book Jwaan. Ja’alibe’ chéen ichil táan u bine’ ka tu yilaje’ ts’o’ok u chukpachtik’ Jwaan ti’ junp’éel nuxi’ sajkaab, ka tu ya’alaj ti’ beya’:
-¿Ba’ax ka beetik Jwaan? Teech in puuts’e’.
-Ma’ teeni’, tene’ ts’a’anen waye’ utia’al in kaláantej yéetel utia’al in láat’ le yóok’ol kaaba’, tu yo’olal ma’ u júutul. Ma’ wá táan a wilik, tene’ way yanene’ laabja’an tak in ta’ waye’. Je’ máax ka taak u beet u yóolal ten waye’ ku bin k’aasil ti’ tumen tak junp’eel káampana ts’a’anten utia’al in kool wá yaan máax u k’áat u beet ten yóol, ma’ teen a puuts’o’. Tene’ jach úuch ts’a’abaken way tumen jajal Dyoos in kaláant le yóok’ol kaaba’ páa’tik a wilik, wá kin luk’esik in k’ab te’ in láat’majil le ka’ana ku júutul -ku t’aan Jwaan.
Ka tu chéen luk’esaj u k’ab Jwaane’, iwe’ej!, ka júut le sajkaabo’. Ka tu chéen jáan ch’ikajubaj tu ka’ateeni’, ts’o’okole’ Ka tu ya’alaj ti’ nuxi’ jkoje’.
-Wa ka wóot a beet ten junp’éel utse’e’, je’a láat’ik le ka’an junsúutuka, tene’, mix janaken buka’aj k’iini’.
Ka tu núukaj nuxi’ jkoje’:
-Wa tumen ma’ táan a xáantale’ Jwaan, tene’ je’ in láat’ik le ka’ano’, ba’ale’ bik a tusen tumen teech in puuts’o’, chéen táan a ka’a tusiken.
-Ma’ teni’. Tene’ janal Dyoos ts’aamajilen waye’ -ku t’aan Jwaan.
Ja’alibe’ nuxi’ jkoje’ ka tu yilaj u ka’a tu’usul, ka tu chéen láat’aj le sajkabo’, ka a’ala’ab ti’ tumen Jwaane’:
-Wá tumen ta wilaj xáanchaj ma’ taalakene’ ka kóolik le chan káampana yan ta tséelo’ ka páatak in taal.
Ja’alibe’ ka tu ch’ikajubaj nuxi’ jkoj u láat’ le sajkaabo’, j náak yóol nuxi’ jkoj ma’ talak Jwaan bija’anil janale’, ka tu jáampaytaj le káampana j a’ala’ab ti’e’, ka lúub junp’eel nuxi’ ts’íibil najil tu kukul chi’ta’al ka jts’íit yáalkab nuxi jkoj. Ja’alibe’ ku jóok’ole ka tu ya’alaj.
-Eyaj le Jwaano’ ts’o’ok u seen tusiken. Yan in chukik yo’olal in jaantik -ku t’aan nuxi’ jkoj.
Ka tsáay tu paach Jwaan. Táan u bin ka tu teek iltaj Jwaan ti’ junp’éel nuxi’ táax k’áankab ti’ u ki’ machmaj junp’éel xtáabka’anil táan u báaxtik.
-Eyaj Jwaan, teech in p’uuts’e’.
-Ma’ teni’. Tene’ in machmaj u táab le ka’ana’ yo’olal ma’ u lúubul, wá kin jáalk’abtike’ ¡adyos! ku ja’ayal yóok’ol kaab. Pa’a’tik a wilik buka’an jats’utsil le xtáab ka’an in machmaja’:
Jwaane’ ku chéen k’íitil u síit’ ka’anale’ ku ya’alik ti’ le xtaabka’anilo’.
-Mutsabaj xtáab ka’anil. Mutsabaj xtáab ka’anil. Sats’abaj xtáab ka’anil. Sats’abaj xtáab ka’anil -ku ka’a éemel k’aabal.
-Jnuxi’ jkoje’ chéen táan u paktik, Jwaane’. Chéen táan u yilik bix kun utusij nuxi’ jkoj, le beetik tu ya’alaj ti’:
-Ma’ wa ka a machten u táab le ka’ana’ je’ a wilik buka’aj jats’utsile’.
Ja’alibe’ nuxi’ koje’ táan u ya’alik ti’ Jwaan.
-Jwaan yan in jaantikech, teech in puuts’e’. Ts’o’ok a seen beetik ten a wóolaj, yan in jaantiketj.
-Wá tumen a k’áat a jáantene’, jáanteni’ ba’ale’ yan xan u xu’ulul yóok’ol káab, ma’ wa’ táan a wilik in machmaj u táab ka’an. Jáan mach junsúutuk, ba’ale’ bik tu’ubuk a wa’alik le ba’ax ken in wa’al techa’.
Ka tu yilaj koj jats’utse’ ka tu chéen machaje’ ka jo’op’ u ya’alik:
-Motsabaj xtáab ka’anil. Motsabaj xtáab ka’anil -táan u chen bin ka’anal.
Ts’o’okole’ ka jo’op’ u ya’alik tu ka’atene’:
-Sats’abaj xtáab ka’anil. Sats’abaj xtáab ka’anil -ki’e’, ku chéen éemel kaabal tuka’aten.
Le ku beetike’ ka jtu’ub ti’ bix kun ya’alij je’ebix a’ala’abik ti’o’ ka jo’op’ u ya’alik ka u motsubaj le xtáab ka’anilo’, chéen táan u jach motsikuba’e ka jt’okchaje’ ka jlúub nuxi’ jkoj. Le ka’a jsuunaj tu yóole, ka tu ya’alaj:
-¡Eyaj le Jwaano’!, ts’o’ok u tíip’il u seen tusiken, yaan túun in jaantik -ku t’aan nuxi’ jkoj.
Ka jtsáay tu paach, Jwaane’ bin tu beetaj, juntats’ak tu chak’aniil tuk’. Ja’alibe’ ku k’uchule’ ka tu yeensaj lajun u kúuchul tuk’e’ ka jo’op’ u pa’ik u jaantej. Chéen naayal yóol táan u jaantik le tuk’o’ le ku yilik u tíip’il nuxi’ jkoj.
-Eyaj Jwaan, teech in puuts’e’ -ku t’aan nuxi’ jkoj ti’.
-Bix a wóol. Tene’ ts’a’anen waye’ utia’al in seen pa’ u tuk’il tuláakal le chaka’ana’. Ts’a’anen tumen jajal Dyoos in kanáantej -ku t’aan Jwaan.
Jwaane’ ku machik le tuk’o’ ku nat’ oktike’, ts’ej, ku pa’ik. Ku machike’ ku jaantik.
-Jwaan, ¿ba’ax le ka jaantiko’?
-Ma’ wa taan a wilik, le ba’ax kin jaantika’ in weebos. Wa ka a beet tech beyo’ je’ a wu’uyik buka’aj ki’ile’, tumen atia’alo’ baj nuuktak le beetik jach ki’ wal u neek’e’ -ku t’aan nuxi’ Jwaan ti’ óotsil jkoj.
Nuxi’ jkoje’ chéen táan u yu’ubik, chéen táan u yilik bix kun táabsbil, ba’ale taak u yilik ba’ax ku beetik Jwaane’, ka jo’op’ u nats’ikubaj chaanbelil yiknale’ yo’olal u jach ilik bix u beetik. Jwaane’ ku nat’ik le tuk’o’, its’ej! ku ku pa’ik, ts’o’okole’ ku machik u neek’o’ ku jaantik. Ku ya’alik Jwaan ti’ nuxi’ jkoje’:
-Je’ela’ túun u neek’ in weebos a wu’uy wa ma’ leen ma’alobo’.
Ka tu machaj nuxi’ jkoje’ ka tu jaantaj ka’alikil táan u jaantike’ ka tu yu’ubaje’ jach ki’, ku yilik Jwaan ts’o’ok u táabsike’ ka tu ya’alaj ti’e’:
-Ma ka a wóote’, beet tech beyo’.
Ja’alibe’ jkoje’ ka tu chéen tukultaje’ ma’ táan u táabsa’al tumen Jwaan, le beetik tu nats’ajubae’ ka jki’ eech’ kulaj tu yóok’ol junp’éel tuuniche ka tu machaj le tuk’o’ ka jo’op’ u pa’ik, ka a’ala’ab ti’ tumen Jwaane’:
-Ma’ leti’elo’, a weebose’ jach báaj ki’ u neek’o’, leti’ ken a pa’e’.
Chéen ichil u tu’usulo’ ka jbin nuxi’ jkoj u jóok’es u weebose ka tu pejkuntaj yóok’ol le tuunicho’ iyach! ka tu puch’aj u weebos, le ku kaakik tikchalaanki tumen tu kíimil. Le ka tu ya’alaj junsúutuke’ ts’o’ok u kíimil nuxi’ jkoj.
Le ka tu yilaj jwaan ts’o’ok u kíimil nuxi’ jkoje’, le ku ts’íitil yáalkab. Táan u chéen papaxk’ab yo’olal le ba’ax ts’o’ok u beetik ti’ jkojo’. Ka jmáanen te’elo’ ti’ p’uka’an Jwaani’, jach ki’imak yóol ikil tu kiinsaji’ jkoj.